= A RECOMENDACIÓN DO MES DE MARZO NA NOSA SECCIÓN "LECTURAS EN FEMININO" É A SEGUINTE:
Lucía Rúa, orientadora do IES Xesús Tabaoada Chivite, fai esta recomendación que agarda sexa a primeira de moitas. Esta sección terá a súa continuidade e así entre todos e todas poder enriquecernos das fabulosas lecturas de autores e autoras que amosan as diversas realidades da nosa sociedade, sempre cunha visión feminista, crítica e igualitaria.
RECOMENDACIÓN: PERSÉPOLE
RECOMENDACIÓN: PERSÉPOLE
Desde hai un par de anos, son unha gran lectora de Novela gráfica, encántame somerxerme na lectura das imaxes que acompañan os textos e diálogos que amosan os escritores/as, deseñadores/as e debuxantes. Lin moitas novelas gráficas que me encantaron como Maus, Epiléptico, Guantánamo kid ou Engurras.
Este verán, a filla de 16 anos dun amigo, recomendoume este libro, contoume brevemente de que trataba pero o que me sorprendeu foron as súas ilustracións, a capacidade de mostrar tantas emocións a través dos seus debuxos un tanto infantís e como o branco e negro achega maior profundidade ao relato.
Persépole é unha novela autobiográfica da súa autora, Marjane Satrapi. Relata a súa adolescencia e xuventude. Comeza cando chega a revolución islámica ao seu país. Irán. Continúa a novela cando é enviada a Europa polos seus pais e o choque cultural ao que se somete porque nada se lle parece ao que facía no seu país. E remata cando volve a Irán para estar coa súa familia, aínda que teña que usar o veo e aceptar a tiranía. É unha reflexión das restricións das libertades individuais que moitas veces pensamos que temos garantidas.
Como opinión personal, encantoume porque a protagonista non se presenta a si mesma nin como unha mártir nin como unha heroína, represéntase como unha muller, como unha de nós.
