= CENTRACIÓN POLO 25-N EN VERÍN
O CIM de Verín (Centro de Información á Muller) convidounos, como cada ano, a formar parte da concentración que se realizou na praza do Concello para denunciar a violencia machista.
O alumnado de 3º ESO coas súas titoras e outro profesorado, asistimos ao acto e tamén formamos parte da lectura do manifesto conxuntamente con outros centros educativos.
Este é o manifesto do que nos facemos eco para dencunciar o 25 de Novembro: Día internacional contra a Violencia de xénero.
MANIFESTO 25N
1
A violencia machista é unha das maiores vulneracións dos dereitos das mulleres. Non ten fronteiras, ten lugar en todos os países e sociedades, sen distinción de clases, etnia e grupo de pertenza. Non hai un perfil de vítima de violencia machista, o único factor de risco é ser muller.
Tras case dous anos inmersas nunha pandemia sanitaria que nos obrigou a confinarnos e perder as nosas relacións sociais, prexudicando o noso benestar psicolóxico e emocional, fomos conscientes do que é vivir con medo, ansiedade, angustia, incertidume e falta de liberdade. Esta é a realidade que sofren moitas mulleres e as súas fillas e fillos a día de hoxe, e moi probablemente preto de ti.
Sen ir máis lonxe, na Comarca de Verín existen 45 ordes de afastamento en activo e 78 mulleres vítimas de violencia machista que reciben axuda psicolóxica.
2
A pesar destas cifras tan impactantes, a realidade da violencia machista vai máis alá. Esta violencia tamén se manifesta noutros ámbitos, como é o caso da prostitución e da trata. Este problema é moi palpable na nosa comarca pois concentra o 60% dos clubes de alterne de toda a provincia. Isto é só a punta do iceberg xa que durante a pandemia afloraron numerosos casos de mulleres que estaban sendo prostituídas en pisos, algunhas nunhas condicións infrahumanas.
As entidades sociais que nos adicamos a este ámbito constatamos un preocupante aumento de casos de violencia machista en menores de idade o que nos fai reflexionar sobre a necesidade da prevención. Esta labor comeza na familia e esténdese aos centros educativos e a sociedade en xeral. Do mesmo xeito que somos capaces de adaptarnos a esta nova normalidade sanitaria debemos tomar conciencia da necesidade de traballar todas as persoas de maneira conxunta contra a lacra da violencia machista, ¡¡¡CONSERVAR O PARITORIO FOI O NOSO PRIMEIRO LOGRO, UNÁMONOS DO MESMO MODO PARA LOITAR CONTRA O MACHISMO!!!
3
O primeiro paso é ter as ferramentas necesarias para identificar os diferentes tipos de violencia, pois non todas son tan evidentes coma a física:
- Se te insultan, ameazan ou coartan a túa liberdade é violencia psicolóxica.
- Se che controlan o diñeiro, é violencia económica.
- Os discursos de odio nas redes e nos medios é violencia estrutural.
- Se destrúe a túa autoestima é violencia emocional.
- Se te sentes forzada, aínda que sexa a túa parella, é violencia sexual.
- Se emprega os teus fillos para facerche dano, é violencia vicaria.
- Se non che permiten decidir sobre as condicións do teu parto ou aborto, é violencia obstétrica.
Non podemos rematar sen visibilizar a situación que están a vivir moitas mulleres no medio rural, derivada da “Lei do silencio” e a ocultación das situacións de violencia, que continúa véndose como asuntos do ámbito privado, cando facelo público é a única solución.
4
Dende as entidades sociais da Comarca queremos mostrar todo o noso apoio ás mulleres que poidan atoparse nalgunha das situacións descritas con anterioridade e que, todas elas, saiban que as nosas portas están abertas para apoialas e acompañalas, así como as súas familias e amizades que de seguro estarán aí para tenderlles unha man e axudarlles a recuperar as rendas das súas vidas.
Manifestamos, polo tanto, o noso compromiso coa:
- Igualdade de dereitos e oportunidades
- Unidade de tódolos axentes implicados e da sociedade contra esta lacra social
- Prevención e educación dentro do sistema educativo que axude a tomar conciencia desta problemática dende idades temperás
- Tolerancia cero coa violencia machista e condena unánime contra os agresores
- Corresponsabilidade de todos e cada un dos individuos que compoñen a sociedade, asumindo a nosa parte nesta situación
- A formación das persoas profesionais que traballamos neste ámbito
- Protección á infancia. A violencia machista afecta de xeito moi cruel tamén aos menores deixando secuelas físicas e psicolóxicas e incluso acabando coa súa propia vida. Neste 2021 cinco nenos e nenas foron asasinados por causa da violencia machista e 24 orfos e orfas pola mesma causa.
- Recordo ás 1118 mulleres asasinadas dende 2003 e ás 37 do 2021:
Laura, Conchi, Alicia, Mari Carmen, María, Jordina, Paula, Pilar, Maria Soledad, Warda, Betty, Lucía, María Teresa, Katia, Nicoleta, Alla, Katherine, Rocío, Alicia, Consuelo, África, Hasna, Joana, Mari Ángeles, Inmaculada, Luisa, Amal, Antonella, Pamela, Oksna, Carmen, Maria Pilar, Zuita, Mónica, Erika, María Isabel.
Non oficiais: Elena, Wafaa, Dary, Luz, Manuela, Maija, dúas mulleres sen rexistro.
Para todas elas adicamos o seguinte minuto de silencio.