= RECOMENDACIÓN PARA REMATAR O ANO: " AS MULLERES E OS HOMES"
Este mes de Decembro o Dpto de orientación do centro quere pechar este ano 2020 recomendando un libro apto para todas as idades, para todo tipo de nenos e nenas, adolescentes, persoas con necesidades educativas, adultos/as ...
Este álbum expón unha análise da sociedade desde o punto de vista da igualdade ou, mellor dito, da desigualdade de xénero. Enuméranse moitas situacións nas que mulleres e homes non reciben o mesmo trato, nin teñen os mesmos dereitos. Todo contado con humor, pero con extrema seriedade, facendo sátira da nosa sociedade.
Non se trata dun conto, non. Desgraciadamente trátase dunha historia moi real, tan real que sigue sendo a mesma despois de moitos anos, cuarenta xa desde a primeira edición deste libro que volveuse publicar da man de Catroventos editora.
É unha boa recomendación para este mes no que sempre cae algún agasallo para nenos e nenas. Un pequeno agasallo educativo, divertido e igualitario.
Evidentemente non é sinxelo abordar este tema cos máis peques dunha forma clara, sen dar un exceso de información que pode resultarlle abrumador. Neste sentido "As mulleres e os homes" configúrase como unha óptima proposta para poder introducir este tema, e para que os nenos e as nenas se cuestionen, se sorprendan, se asombren, e critiquen.
Fálase de política, de relixión, de relación social, de familia, do concepto que teñen os nenos e nenas de si mesmos/as, da súa familia, de todas as persoas coas que se relacionan a diario. Xa desde a portada despértase o debate sobre a liberdade de ser home ou muller.
Agardamos que o disfrutedes.
NOTA: Xenial o traballo da ilustradora Luci Gutiérrez: un estilo moi limpo que xoga só con 4 cores – branco, negro, verde e vermello - e que amosa a imaxe con extremo coidado e perfección.